jueves, 7 de febrero de 2013

Feik!

Dokumental faltsuen liluraren inguruko ikerketa batean murgilduta nabil. Atzo bromatan aritu ginen Rajoy-ren "Todo es falso" nire lanaren aipu bibliografiko bezala sartzeko pertinentziaz... Eta gaur, ustelkeriaz gainezka dauden egunkaritan, artista faltsutzaile xarmagarri bati buruzko albistea agertu da. Orson Welles-en F for Fake filmean deskubritu genuen Elmyr de Hory pintura faltsutzailearen koadro faltsuekin (edo imitazioekin?) erakusketa bat egin dute Madrilen.

Esaten dutenez, 1.000 koadro faltsu saldu zituen de Hory-k. Horietako batzuk Madrileko erakusketan egongo dira. Gehienak, mundu osoko museo eta bilduma ospetsuetan, bankarien bulegotan... Modigliani, Picasso, Matisse... De Horyk bere ametsa bete zuen.

Aurrekoan pelikulen trailerrak aipatu nituen blog honetako sarrera batean. Gaur aurkitu dut F for Fake filma AEBetan aurkezteko Wellesek egin zuen 10 minutuko trailerra. Elmyr de Hory bertan azaltzen da, bere saltsan. Trailerraren hasierako testuak dio Orson Welles berak 1976an filmatutako eta editatutako trailer hau ez zela inoiz ikusi.

"But this trailer was never shown..."


No hay comentarios:

Publicar un comentario